ماذا حصل مع بان كي مون في زواريب نهر البارد؟
بقلم: نزار أبو حيط
أصرّ الأمين العام للامم المتحدة بان كي مون أثناء زيارته التاريخية لمخيم نهر
البارد أن يجول في زواريب المخيم ويطلٌع على احوال اللاجئين هناك والاستماع الى شكاويهم
وتقديم النصائح لهم في اطار أخذ العبر والاستفادة من دروس الماضي المؤلمة التي ادت
الى تدمير المخيم عام 2007 . وهي اول زيارة يقوم بها امين عام للامم المتحدة لمخيم
فلسطيني منذ النكبة عام 1948.
اتجهت الانظار نحو (ام العبد) المعروفة بجرأتها و فضولها و قوة شخصيتها.
أسرع ( عبد ) نحو أمه التي كانت منهمكة في فرم اول طبخة ملوخية لهذا الموسم
في مطبخها المتواضع وقال لها: " يما ، يما اتركي اللي بايديك وتعالي بسرعة ، في
زلمي برا بدو يحكي معك":
- مين هاض يما، خلليه يفوت ، بس قوللو يشلح من اجرو، اسا كنست البيت.
- شو يشلح وما يشلح ، يما الزلمي معو وفد وناس كتير ، يما هاض شخصية مهمة، يعني
فيكي تقولي رئيس العالم وجاي يساعدنا، خلصينا تعالي.
خرجت ام العبد برفقة ابنها وهمس لها :" يما هاض اللي لابس نظارات
".
همست ام العبد لابنها : عزا يما هاض نايم ومغمض عينيه ،كيف بدي احكي معه.
- يما مش نايم ، مش ناااايم ، هو هيك عينيه ، لانه اصلو كوري.
لم ينتظر بان كي مون كثيرا حتى امسك يد ام العبد قائلاً لها: يا حجة انتو اصحاب
قضية واللي صار بالمخيم كان نتيجة تدخلكو بشؤون ما بتعنيكو ، بتمنى تحكي مع الشباب
ما يتدخلو بشغلات كبيرة بتضر المخيم ، وانا هون لاسمع لشكواكو.
- طيب معقول خيا تسع سنين و بعدكو يا دوب عمرتو نص المخيم ؟بدناش منكو شي بس
رجعونا عبلادنا!
- يا حجه انا رح اعطيكو نص ميزانية الامم المتحدة لتكملو اعمار المخيم، طمني
بالك.
- عزا يا مشحر والنص التاني لمين بدك تعطيه؟
بان كي مون... أنهى زيارته بعد ما اعرب عن قلقه الشديد من تدخلات ام العبد وقرر
ان لا يزور منطقة الشرق الاوسط باكملها، تاركاً ام العبد تتمتم: " عزا الله يقطعني
لشو جبت معي كرت الاعاشة والهوية الزرقا ؟"